২৯ ডিসেম্বর অনড়হিয়া পাউল জুঝার সরেনাক্ সাগুন জানাম মাহা ।
১৮৯২ সাল রেয়াক্ নওয়া দিনরে সানতাল পরগনা জেলা রেয়াক্ পাকুড়িয়া থানারে মেনাক্ চুনপাড়া আতোরে নুয় দ ধারতি রেয়াক্ পাহিল মারসালে ঞেল লেদা । আচ্ বাবা-আক্ ঞুতুম দ মুনসি পাগু সরেন আর আচ্ আয়ো -আক্ দ মাকু সরেন । জুঝার আচ্ বাবা দ প্রাইমারি ইসকুলরেন চেচেৎইচ্ আর আচ্ হাড়াম বা’ পেকো সরেন দ অনডেনিচ্ পারগানায় তাঁহেকানা ‌।
জুঝার দ আতো ইসকুল খন এতহপ্ সিখনাত আর দুমকা জেলা হাই ইসকুল খন ম‍্যাট্রিক বিডাউ (১৯১১) -এ পাস লেদা । অনা তায়ম কলকাতা সেন্ট পলস্ কলেজ খন আই. এ. (১৯১৩) দয় পাস লেদা ।
পাউল জুঝার সরেন দ সাব-ইন্সপেক্টর অফ সানতাল স্কুলস্ লেকাতে সরকারি কামিরেয় বাহাল লেনা । তায়মতে প্রমোশন ঞাম কাতে স্পেশাল ডেপুটি ইন্সপেক্টর -এ হোয়লেন তাঁহেনা । চাকরি খন জিরাউ কাতে উনি দ রাজনীতি রেয় সেলেৎ লেন তাঁহেনা আর ১৯৫২ সালরে এম. পি. লেকাতেয় বাছাও লেনা ।
পাউল জুঝারাক্ জত খন মারাং ওনোরোম দ কানা সানতালি সাওহেৎ রেন মিৎ ঞুতুমান অনড়হিয়া লেকাতে । উনিয়াক্ অল ‘ অনড়হে বাহা ডালওয়াক্ ‘ (১৯৩৬) গে কানা সানতালি তেয়াক্ পাহিল উতার অনড়হে পুথি দ । অনারে দ জততে ৩৪ গটেন অনড়হে মেনাক্ আকাদা ।
অনা বেগর , উনি দ আয়মা গায়ান হয় অললেৎ তাঁহেনা । অনা কো দ হোয়োক্ কানা — হালা বাদলা , জোসেফ , মাধোসিঞ , জুদুডি আতো ,মারে ঢল , আতো পুনাসি , তেহেঞাক্ সানতাল পরগনা এমান । অনল হ আয়মা তাঁহেকান তায়া । জেলেকা— সানাম জায়গারে তাহেঁনিচ্ , কাপি কারান , দেসমাঝি সীতারামাক্ বক্তান , দিসম দুলাড় , হমন্ত রান এমান । পাউল জুঝার সরেন দ আয়াক্ জিয়ন চরিত হয় অল লেদা মেনতে বাডায়ক্ আ । মেনখান নওয়া কো অল দ নিত হাবিচ্ বাং ছাপা সদর আকানা ।
তেহেঞ , অনড়হিয়া-আক্ সাগুন জানাম মাহারে উনি ঞুতুমতে তাঁহেয়েনা ইঞাক্ গুনমানাও সারহাও আর মানোত জহার ।

✍️মহাদেব হাঁসদা